Mabingwa wa soka Tanzania, Simba wamefuzu kucheza fainali ya SportPesa Super Cup baada ya kuichapa Kakamega Homeboyz kwa mikwaju 5-4.

Mabingwa wa soka Tanzania, Simba wamefuzu kucheza fainali ya SportPesa Super Cup baada ya kuichapa Kakamega Homeboyz kwa mikwaju 5-4. 

Mechi hiyo iliisha kwa sare ya bao 0-0 katika hatua ya dakika 90 za kawaida. 

KIPINDI CHA KWANZA 

Ikiwa Simba ilicharuka kuanzia dakika ya 30-45, na kutengeneza mashamblizi matano ya maana lakini haikuweza kupata bao. 

Ilianza kwa shuti la Shiza Kichuya kupaa katika dakika ya 35 kabla ya shuti la Haruna Niyonzima kupanguliwa na golikipa wa Kakamega Homeboys, Mauda Hedmond. Chipukizi Rashid Juma nusura aipatie Simba bao katika dakika ya 38 lakini shuti lake lilidakwa kabla ya Mohammed Rashid kupoteza nafasi mbili za wazi kabla ya mpira kwenda mapumziko. 

KIPINDI CHA PILI 

Simba ilianza dakika 10 za kwanza za kipindi cha pili kwa kasi, na kutengeneza nafasi mbili kupitia kwa Rashid Juma lakini golikipa wa Kakamega, Mauda Hedmond alikuwa makini kuzuia hatari hizo. 

Jonas Mkude alionyeshwa kadi ya njano katika dakika hiyo huku Simba ikimtoa Rashid Juma na kumpa nafasi Adam Salamba. 

Kakamega walicharuka katika dakika ya 60-70 lakini juhudi za washambuliaji wao wawili, Mudavadi Mosses na Noah ziliishia mikononi mwa Manula. 

Erasto Nyoni alipoteza nafasi ya kuifungia Simba bao la kuongoza dakika ya 70 kabla ya Mosses Kitandu aliyeingia kuchukua nafasi ya Mohammed Rashid kushuhuidia shuti lake likidakwa na kipa wa Kakamega, Hedmond dakika tano baadaye. 

Baada ya hapo ikawa ni mikwaju ya penalti na wachezaji wote watano wa Simba walifunga wakiongozwa na Jonas Mkude ambaye alifunga penalti ya mwisho. Mkude amefunga penalti hiyo ikiwa ni ya tano baada ya wachezaji wengine kama Haruna Niyonzima, Erasto Nyoni Shomari Kapombe na Shiza Kichuya kutupia vyema wavuni penalti zao.