karius atishiwa maisha pamoja na familia yake ni baada ya kusababisha liverpool kulikosa kombe la uefa katika final hizo

Hali si nzuri kwa kipa wa Liverpool, Loris Karius. Kwa sasa anapambana na hali yake nje ya uwanja baada ya Polisi wa Merseyside kukiri kuwa, wanafuatilia kwa karibu tishio la kifo lililotolewa kwa staa huyo, baada ya pambano la fainali ya Ligi ya Mabingwa Ulaya dhidi ya Real Madrid, Jumamosi iliyopita. 

Staa huyo Mjerumani mwenye umri wa miaka 24 pamoja na familia yake, walitishiwa mitandaoni na watu wasiojulikana kutokana na makosa yake mawili ya kizembe yaliyosababisha mabao mawili ya Real Madrid katika ushindi wa mabao 3-1 dhidi ya timu yake. 

Karius alilia mara baada ya kumalizika kwa pambano hilo lililopigwa jijini Kiev na aliomba msamaha kwa mashabiki wa Liverpool waliokuwa uwanjani, lakini baadhi ya mashabiki kupitia mitandao ya kijamii wamemjia juu kwelikweli. 

“Huwa tunaangalia matishio ya mitandao ya kijamii kwa umakini mkubwa. Matatizo kama haya yatachunguzwa. Maofisa wa Polisi wanajua idadi ya matishio yanayotolewa kupitia mitandao ya kijamii.” Ilisema taarifa hiyo. 

“Polisi wa Merseyside ingependa kuwakumbusha watumiaji wa mitandao ya kijamii kwamba, makosa yoyote ambayo yanapelekea kuharibu amani na hasa kutishia mtu mwingine yatachunguzwa kwa umakini,” ilimalizia taarifa hiyo ya Polisi. 

Mjerumani huyo alimzawadia bao la kwanza mshambuliaji wa kimataifa wa Ufaransa, Karim Benzema baada ya kurudisha mpira ovyo kabla ya kuruhusu kizembe bao la pili la Gareth Bale baada ya kushindwa kuukamata vema mpira wa Bale. 

Mara baada ya kumalizika kwa pambano hilo, Karius ambaye alinunuliwa na Liverpool kutoka klabu ya Mainz ya Ujerumani, alitumia mitandao ya kijamii kuandika ujumbe mrefu wa kuomba msamaha. 

“Naomba samahani sana kwa wachezaji wenzangu, nyinyi mashabiki na wafanyakazi wote. Najua nimefanya makosa mawili na nimewaangusha wote. Sijalala mpaka sasa. Matukio bado yanajirudia kichwani kwangu tena na tena,” aliandika Karius. 

“Natamani ningerudisha muda nyuma, lakini jambo hilo haliwezekani. Na najisikia vibaya kila ninapokumbuka kwamba, tungeweza kuwafunga Real Madrid na tulicheza vizuri mechi kwa muda mrefu. Shukrani kwa mashabiki ambao, mlisafiri mpaka Kiev na bado mlinisapoti baada ya mechi. Sichukulii poa lakini kwa mara nyingine ilionyesha jinsi gani sisi ni familia kubwa. Asante sana na tutarudi tena tukiwa imara.” 

Kocha wa Liverpool, Jurgen Klopp, ambaye bado anasaka taji lake la kwanza kwa Liverpool tangu alipojiunga na klabu hiyo Oktoba 2015, amesema anamuonea huruma kipa wake, Karius na anajua jinsi anavyojisikia kwa kile kilichotokea. 

“Kosa la pili lilitokana na kosa la kwanza. Ni ngumu sana kuondokana na mawazo mabaya kichwani. Loris anajua hivyo, na kila mtu anajua hivyo. Ni kitu cha fedheha katika mechi kama hii, katika msimu kama huu, namuonea huruma. Ni mtu mzuri sana,” alisema Klopp. 

Karius pia alifungwa bao maridadi na Bale ambalo lilikuwa la pili kwa Madrid katika pambano hilo na Klopp hana neno kwa bao hilo ambalo linaingia katika historia ya kuwa moja kati ya mabao bora kufungwa Ulaya. 

“Kiki ya hewani ya Gareth Bale ilishangaza sana. Tulifanya kila kitu tulichoweza na vijana walijaribu kila waliloweza, lakini haikuwa siku yetu. Kila kitu kilituendea poa msimu huu. Tulikwenda katika fainali kwa ajili ya kushinda. Ilikuwa ni nafasi nzuri kwetu, lakini hatukufanikiwa. Tunashinda kama timu na tunapoteza kama timu,” alisema Klopp. 

Naye nahodha wa Liverpool, Jordan Henderson, aligoma kumlaumu Karius licha ya Liverpool kupokea kipigo chake cha tatu katika fainali chini ya Klopp baada ya kupoteza fainali za Kombe la Ligi na Europa mwaka 2016. 

“Si suala la makosa ambayo Loris Karius amefanya. Tulikwenda katika fainali kama timu na tumepoteza kama timu. Ni suala la kila mtu. Hatukuwa wazuri sana usiku ule,” alisema nahodha huyo.