WEWE NI MSHABIKI WA LIGI KUU BARA? SASA FAHAMU MATOKEO YA MICHEZO 10 ILIOKUWA MIBAYA SANA KWA MASHABIKI WA SIMBA NA YANGA 2018

Wakati mashabiki wa Yanga wakiwa wanashangilia na baadhi yao wakiwa wametoka nje na ngoma, wakidhani timu yao imeshaibuka na ushindi, Mbeya City ilisawazisha kwenye dakika za majeruhi. 

likuwa ni kwenye dakika ya mwanzo ya zile sita za nyongeza, iliyozima ndoto za Yanga kuondoka na ushindi kwenye mechi hiyo na kuambulia sare ya bao 1-1 kwenye Uwanja wa Sokoine, Aprili 22, mwaka huu. 

Huu ni muendelezo wa mabao yanayofungwa kwenye dakika za mwisho kabisa za mchezo katika Ligi Kuu Tanzania Bara. 

Katika makala haya nimeorodhesha mechi zenye mabao yaliyofungwa dakika za mwisho za mchezo, wakati kila mmoja akisubiri mwamuzi apulize kipenga cha kumaliza mpira. 

1. Prisons vs Majimaji 

Mechi hii ya mzunguko wa kwanza ilichezwa Septemba 9 mwaka jana kwenye Uwanja wa Sokoine Mbeya. Prisons tayari ilikuwa na uhakika wa ushindi, kwani ilikuwa ikiongoza mabao 2-1 dhidi ya Majimaji. 

Dakika ya 90, Majimaji ilipata penalti na Marcel Boniventure akatumbukiza mpira wavuni, mechi ikaisha kwa sare ya mabao 2-2. 

2. Mtibwa Sugar vs Mbao FC 

Wachezaji wa Mbao tayari waliamini kuwa wamewaweza Mtibwa Sugar nyumbani kwao Uwanja wa Manungu, kwani tayari walikuwa wamelazimisha sare ya bao 1-1. 

Dakika ya 90, Kelvin Sabato akabadilisha hali ya hewa, alipofunga bao na kuipatia ushindi Mtibwa wa mabao 2-1. Mechi ilchezwa Septemba 16, mwaka jana. 

3. Simba vs Mtibwa Sugar 

Baadhi ya wanachama na mashabiki wa Simba walikuwa wameshaanza kuondoka kwenye Uwanja wa Uhuru, wakiamini timu yao imelala kwa bao 1-0 dhidi ya Mtibwa Sugar kwa bao la Stamili Mbonde dakika ya 35. Ziliongezwa dakika nne za majeruhi. 

Simba ilipata faulo nje ya eneo la hatari ambayo hakuna aliyetegemea kuwa lingeweza kuwa bao. Emmanuel Okwi aliuweka mpira ndani ya wavu kwenye dakika ya tatu ya nyongeza na mechi kuisha kwa sare ya bao 1-1. Ilikuwa ni Oktoba 15, mwaka jana. 

4. Majimaji vs Mbao FC 

Habib Kyombo alifunga bao kwa mkwaju wa penalti dakika ya 90, Novemba 18, mwaka jana, lakini likiwa bao la kufutia machozi, timu yake ikifungwa 2-1 dhidi ya Majimaji mjini Songea. 

5. Mbeya City vs Prisons 

Januari 13, mwaka huu, Babu Ally aliifungia Mbeya City bao dakika ya 90, lakini timu yake hiyo ikipokea kipigo cha mabao 3-2 dhidi ya mahasimu wao wa mji mmoja, Prisons kwenye Uwanja wa Sokoine. 

6. Singida United vs Mwadui FC 

Wakati benchi la ufundi la Mwadui na mashabiki wao wachache wakijiandaa kushangilia sare ya ugenini ya mabao 2-2 dhidi ya Singida United kwenye Uwanja wa Namfua, Kenny Ally aliifungia Singida bao la tatu dakika ya 90 na kuwafanya wenyewe kushinda 3-2. Ni mechi iliyochezwa Februari 3, mwaka huu. 

7. Mwadui vs Simba 

Ilikuwa ni Februari 15, mwaka huu kwenye Uwanja wa Kambarage Mjini Shinyanga, wakati mashabiki wa Simba wakiamini kuwa timu yao ingeibuka na ushindi wa mabao 2-1.Dakika moja tu kabla ya mwamuzi kupuliza filimbi ya mwisho, Paul Nonga, aliisawazishia Mwadui bao na timu hizo kutoka sare ya mabao 2-2. 

8. Njombe Mji vs Majimaji 

Majimaji ilinusurika kipigo ugenini Februari 17, mwaka huu kwenye Uwanja wa Sabasaba mjini Njombe iliposawazisha bao dakika ya pili ya nyongeza, likifungwa na Aziz Sibo na kuwanyang'anya tonge wenyewe waliokuwa tayari wana uhakika wa kutoka uwanjani na ushindi wa bao 1-0. 

9. Ruvu Shooting vs Mbeya City 

Ruvu Shooting ingeweza kulala nyumbani kwenye Uwanja wa Mabatini Mlandizi mkoani Pwani mabao 2-1 dhidi ya Mbeya City Machi 11, mwaka huu, kama si bao la dakika ya tatu ya nyongeza lililofungwa na Jamal Sudi na kuifanya timu hiyo kulazimisha sare ya mabao 2-2. 

10. Mbeya City vs Yanga 

Alikuwa ni Idd Selemani aliyezima ndoto za Yanga kuibuka na pointi tatu, alipofunga bao dakika ya kwanza ya ngongeza kati ya sita zilizoongezwa, lililoifanya Mbeya City kutoka sare ya mabao 2-2.