MKWASA >> SIMBA ISIJE IKATEGEMEA MIUJIZA KAMA HII TENA MWAKANI,

Yanga imekubali msimu huu 'wamechemka' lakini wametoa neno kwa mabingwa wapya wa Ligi Kuu, Simba kuwa furaha yao ni ya msimu mmoja tu. 

Akizungumza jijini Dar es Salaam jana, Katibu Mkuu wa Yanga, Charles Mkwasa, amesema kuwa Simba watashangilia kwa msimu huu na msimu ujao watalirejesha kombe la ligi kuu sehemu yake (kwenye klabu ya Yanga). 

"Tumewaachia kwa mwaka huu wafurahi, furaha zao ni msimu huu tu, msimu ujao tutalichukua kombe letu," alisema Mkwasa na kuwaacha watu waliokuwa karibu yake wakiangua kicheko. 

Alisema mashabiki wa Yanga wasiumizwe sana na kupoteza ubingwa na badala yake waunganishe nguvu zao kwenye kuiandaa timu kwa ajili ya msimu ujao. 

"Lakini pia bado tunashiriki michuano yakimataifa, nguvu zetu sasa tunaelekeza kwenye michuano hiyo, hatujafanya vizuri kwenye michezo miwili ya kwanza lakini bado tuna nafasi ya kufanya vizuri," alisema Mkwasa. 

Aidha, alisema kwa kuwa ligi kuu inaelekea ukingoni na mchezo wao unaofuata wa kombe la Shirikisho Afrika unafanyika mwezi Julai, wataitumia michuano ya Kombe la Sportpesa Super kukiandaa kikosi chao. 

"Tutaenda Nairobi kwenye michuano hii na kikosi kamili, tutakitumia kujiandaa na mchezo wetu dhidi ya Gor mahia utakaochezwa Julai," aliongeza kusema. 

Michuano hiyo ya Sportpesa Super Cup imepangwa kufanyika kuanzia Juni 3 hadi 10 mwaka huu jijini Nairobi, Kenya kwa kushirikisha timu nane.